Lontar

Conto gambar lontar saking Bali. Ukuran aslinyane kirang langkung 3,5 x 30 cm.

Duang lempir lontar kakawin Ramayana sané paling tua miwah mangkin kasimpan ring Perpustakaan Nasional R.I. Lontar puniki saking pegunungan Merapi-Merbabu, Jawa Tengah ring abad ka-16 M. Ukuran asline kirang langkung 3,5 x 65 cm.

Lontar inggih punika don siwalan sané sampun kaproses kantos prasida kaanggén nyurat utawi makarya tulisan, lumrah kaanggén antuk sasuratan. Ring Bali lontar pinaka alat tulis kantun kakaryanin kantos mangkin. Lontar sané kaanggén piranti nyurat punika kaproses kirang langkung nem sasih kantos a awarsa. Sané kapertama, ngalap don ental punika kamargiang ring bulan Maret utawi April miwah Séptémber utawi Oktober. Kapilih bulan punika, riantukan ring bulan punika, don-don entalé sampun wayah tur becik. Risampuné punika, don-don ental punika kagetep-getep raris kajemuh. Puniki sané ngawinang lontar sané mawarna gadang dados mawarna kuning. Proses salanturnyané, lontar-lontar punika kaemem ring toya sané membah, raris kaberisihin antuk sambuk. Risampuné bresih, lontar-lontar punika kajemuh malih raris kakesot, kakelésang lidinnyané. Ri sampuné tuh raris kalablab. Sesampuné kalablab kirang langkung kutus jam raris don ental puniki kajemuh malih. Risampuné tuh, don entalé kaduduk raris kajepit aji pamlagbag. Tetujoné apang makejang lontar-lontare puniki becik.

Piranti sané kanggén nyurat ring don lontar kawastanin pangrupak. Yéning lontar punika sampun kasuratang nganggén pangrupak, salanturnyané lontar punika kaselemin antuk tingkih sané sampun metunu kanti selem. Sedurung lontar kasuratin diberi garis terlebih dulu, mangde suratané rapi. Ring lontar wénten 3 song, song kiwa, tengen, miwah tengah.